საქართველოში რეგიონული და ადგილობრივი განვითარების ხელშეწყობის პროგრამა განხორციელდება

საქართველოში რეგიონული და ადგილობრივი განვითარების ხელშეწყობის პროგრამა განხორციელდება

დღეს, რეგიონული განვითარებისა და ინფრასტრუქტურის მინისტრმა ზურაბ ალავიძემ და გაეროს განვითარების პროგრამის (UNDP)  ხელმძღვანელმა საქართველოში ნილ სკოტმა ხელი მოაწერეს შეთანხმებას, ახალი პროექტის დაწყების  შესახებ, რომელიც საქართველოს რეგიონული და ადგილობრივი განვითარების ხელშეწყობას ემსახურება. 
ახალი ინიციატივა უფრო გრძელვადიანი დახმარების ნაწილია, რომელსაც გაეროს განვითარების პროგრამა (UNDP) ავსტრიისა და შვეიცარიის მთავრობების ფინანსური მხარდაჭერით ახორციელებს. 
ზურაბ ალავიძემ გაეროს განვითარების პროგრამის ხელმძღვანელობას, შვეიცარიისა და ავსტრიის მთავრობებს, რეგიონული განვითარების მიმართულებით გადადგმული ნაბიჯებისთვის მადლობა გადაუხადა.
,,ორი კვირის წინ, ჩვენ საზოგადოებას გავაცანით თვითმმართველობის დეცენტრალიზაციის ხედვა, რომელიც მეტ შესაძლებლობებს იძლევა ადგილებზე გადაწყვეტილებების მიღებისა და ფინანსური რესურსების განკარგვის საკითხებში. ასევე, იზრდება მუნიციპალიტეტების როლი ეკონომიკის წახალისებაში და მოქალაქეთა ჩართულობა. ყველა ამ მიმართულებით დღეს არსებული ვითარება რეგიონებში არ არის დამაკმაყოფილებელი და ჩვენი პარტნიორების კვლევები სწორედ არსებული პრობლემების დაძლევაში გვეხმარება. საქართველოში რეგიონული და ადგილობრივი განვითარების ხელშეწყობის მიზნით გაეროს განვითარების პროგრამა 4 წელი გრძელდებოდა, დღეს კი იწყება პროექტის მე-2 ფაზა, რაც დაგვეხმარება წარმატებით  განვახორციელოთ დეცენტრალიზაციის ამბიციური გეგმა, რაც პირველ რიგში, ჩვენი მოქალაქეებისთვის გაუმჯობესებული სერვისების მიწოდებას ნიშნავს’’-განაცხადა ზურაბ ალავიძემ . 
დღესვე, სასტუმრო ,,თბილისი მერიოტში’’ ფართომასშტაბიანი კვლევების შედეგების პრეზენტაცია მოაწყო, თუ რამდენად კმაყოფილია საქართველოს მოსახლეობა საზოგადოებრივი მომსახურებით. 
ღონისძიება  საქართველოს პარლამენტის თავმჯდომარემ ირაკლი კობახიძემ გახსნა. პრეზენტაციაზე რეგიონული განვითარებისა და ინფრასტრუქტურის მინისტრი, ავსტრიის განვითარების სააგენტოს სამხრეთ კავკასიის წარმომადგენლობის ხელმძღვანელი, სამხრეთ კავკასიაში შვეიცარიის თანამშრომლობის ოფისის რეგიონული დირექტორი და გაეროს განვითარების პროგრამის (UNDP) ხელმძღვანელი მონაწილეობდნენ.